அதிர்ஷ்டமதை அறிவிக்கும் குடுகுடுப்பைக்காரன்!

Su.tha Arivalagan

Nov 06, 2025,04:48 PM IST

- கவிதா உடையப்பன், சேலம்

நல்ல காலம் பொறக்குது நல்ல காலம் பொறக்குது !

ஜக்கம்மா நல்லாசி புரிஞ்சிட்டா

நாளைய பொழுதும் விடிஞ்சிட்டா

மகமாயி செல்வத்த வாரி வழங்கிடுவா

கல்லும் முத்தாகுமப்பா !

கலகலன்னு சிரிப்புச் சத்தம் ஒ வீட்ல கேக்குதப்பா

நீ கருணை ஜீவனப்பா

கடகடன்னு ஒ அந்தஸ்து ஏறுமப்பா

சுக்கிரன் தான் வீட்ல புகுந்திட்டாம்மா !

சுப நிகழ்சிகள் அடுத்தடுத்து நடக்குமம்மா

கீரைய கில்லி போட்டு கூட்டு வச்சிருப்ப

இனி, முந்திரிய அள்ளிப் போட்டு ஆயிரம் பேருக்கு குடுப்ப

ரோஜாப்பூ போல இருக்கும் ஒ முகத்த பாரு !

தோட்டத்தில ஊசி தட்டான் திரியுது பாரு

வீட்டுக்குள்ள பச்ச வெட்டிக்கிளி பறக்குது பாரு

ஒ இஷ்டமெல்லாம் விரைவா நிறைவேறும் பாரு

வாழ்க்கை ஓட்டத்தில நீ நின்னியே தேவதையா !

மூக்கை சிமிட்டி சிரிச்சியே மரக் காயா

ஒ இல்லத்த நல்லதாயி காப்பா

அவ உள்ளத்திலதான் குடியிருப்பா

காத்திருந்த நாட்களெல்லாம் கப்பலேறி போச்சு !

கரை ஏறி நீயும் வந்திட்ட ஆச்சு

தாமிர பரணி போல துள்ளி ஓடிடுவ

தங்க மீனப் போல நீயும் மின்னிடுவ

சாத்தியமான்னு கேக்காத தாயி

அதிசயம் நடக்குது, நல்லசொல்ல நம்பு நீ

அதிர்ஷ்டம் அதிர்ஷ்டம் அத்தனையும் சிருஷ்டம் !

தானா பெருகுது ஒ குடும்ப விருக்ஷம் !

(சேலத்தைச் சேர்ந்த எழுத்தாளர், கவிஞர் கவிதா உடையப்பன் ரத்தினா செந்தில்குமார் தலைமையிலான திருவண்ணாமலை தடம் பதிக்கும் தளிர்கள் பன்னாட்டு தமிழ்ச் சங்கத்தின் பல்வேறு நிகழ்வுகளில் பங்கேற்றவர். தன்னம்பிக்கை பேச்சாளரும் கூட)