துபாய்: இந்தியர்களுக்கும் தங்கத்திற்குமான பந்தம் என்றும் பிரிக்க முடியாதது. சுப நிகழ்ச்சிகள், சேமிப்பு என அனைத்திற்கும் நாம் தங்கத்தையே நாடுகிறோம். இந்நிலையில், இந்தியாவில் தங்கம் மற்றும் வெள்ளி மீதான இறக்குமதி வரியை மத்திய அரசு உயர்த்தியதைத் தொடர்ந்து, 'பவுன் பவுனாக' தங்கம் வாங்க இந்தியர்கள் துபாய் நோக்கி தங்களது பார்வையைத் திருப்பியுள்ளனர்.

துபாயில் தங்கம் மலிவானது ஏன்?

இந்தியாவில் தங்கம் மற்றும் வெள்ளி மீதான இறக்குமதி வரியை அரசு அண்மையில் 15 சதவீதமாக உயர்த்தியுள்ளது. இதன் காரணமாக, இந்தியச் சந்தையுடன் ஒப்பிடும்போது துபாயில் தங்கம் வாங்குவது சுமார் 12 சதவீதம் வரை மலிவாகியுள்ளது. தற்போது இந்தியாவில் தங்கம் விலை விண்ணைத் தொட்டு வரும் நிலையில், இந்த விலை வித்தியாசம் இந்தியப் பயணிகளைப் பெரிதும் கவர்ந்துள்ளது.

யார் எவ்வளவு நகை கொண்டு வரலாம்?

வெளிநாட்டில் தங்கம் மலிவாகக் கிடைக்கிறது என்பதற்காக நாம் நினைத்த அளவு அதை இந்தியாவிற்குள் எடுத்து வந்துவிட முடியாது. அதற்கு இந்திய சுங்கத் துறை (Customs) சில கடுமையான விதிகளை விதித்துள்ளது. வெளிநாட்டில் ஓராண்டுக்கும் மேலாக வசிக்கும் இந்தியர்களுக்கு இந்த சுங்கவரி சலுகைகள் பொருந்தும்.

பெண்கள்: ஒரு பெண் பயணி 40 கிராம் (சுமார் 5 பவுன்) வரை தங்க நகைகளைச் சுங்கவரி ஏதுமின்றி சட்டப்பூர்வமாகக் கொண்டு வரலாம்.

ஆண்கள்: ஒரு ஆண் பயணி 20 கிராம் (சுமார் 2.5 பவுன்) வரையிலான தங்க நகைகளை வரி இல்லாமல் எடுத்து வர அனுமதி உண்டு.

தம்பதியினர் (கணவன் - மனைவி): இருவரும் இணைந்து பயணிக்கும் போது மொத்தம் 60 கிராம் வரை தங்க நகைகளைச் சுங்கவரி இல்லாமல் கொண்டு வர முடியும்.

குடும்பமாகப் பயணித்தால்: இரண்டு ஆண்கள் மற்றும் இரண்டு பெண்கள் கொண்ட ஒரு குடும்பம், ஒன்றாகப் பயணிக்கும் போது 120 கிராம் முதல் 140 கிராம் வரையிலான தங்க நகைகளைச் சுங்கவரி இன்றி சட்டப்பூர்வமாகக் கொண்டு வரலாம்.

இந்த சுங்கவரி சலுகை மற்றும் அனுமதி தங்க நகைகளுக்கு மட்டுமே பொருந்தும். நீங்கள் தங்க நாணயங்கள் (Gold Coins) அல்லது தங்கக் கட்டிகளாக (Gold Bars) கொண்டு வந்தால், அதற்குரிய முழுமையான சுங்கவரியைச் செலுத்த வேண்டும் என்பதை நினைவில் கொள்ளவும்.

இந்தியச் சந்தையில் இன்றைய தங்கம் விலை நிலவரம் :

தற்போது இந்திய சந்தையில் தங்கத்தின் விலை மிக உச்சத்தில் உள்ளது. இன்றைய நிலவரப்படி, 22 கேரட் ஆபரணத் தங்கம் ஒரு கிராம் ரூ.14,500-க்கும் மேல் வர்த்தகமாகிறது (1 சவரன் ரூ.1,16,000 கடந்துள்ளது). அதேபோல், 24 கேரட் தூய தங்கம் 10 கிராம் ரூ.1,58,000-ஐத் தாண்டி விற்பனை செய்யப்படுகிறது.

இந்தியாவில் தங்கம் விலை தொடர்ந்து ஏறுமுகமாக இருக்கும் இந்தச் சூழலில், துபாய் செல்லும் இந்தியர்கள் அங்குள்ள சுங்க விதிகளுக்கு உட்பட்டு நகைகளை வாங்கி வருவது நல்லதொரு சேமிப்பாக அமையும் என்பதில் சந்தேகமில்லை!