சென்னை: தமிழ்நாட்டில் இன்று முதல் ஐந்தாம் தேதி வரை ஒரு சில இடங்களில் கனமழைக்கு வாய்ப்பு இருப்பதால் மஞ்சள் எச்சரிக்கை விடுத்துள்ளது இந்திய வானிலை ஆய்வு மையம்.

தமிழ்நாட்டில் கடந்த சில நாட்களாகவே வெயிலின் தாக்கம் அதிகமாக இருந்து வந்தது. இதனால் மக்கள் கடும் சிரமத்தை சந்தித்தனர். தற்போது வெப்ப சலனம் காரணமாக தமிழ்நாட்டில் நேற்று இரவு முதல் பல்வேறு பகுதிகளில் சாரல் மழை முதல் மிதமான மழை வரை பெய்து வருகிறது. குறிப்பாக மதுரையில் கடந்த 24 மணி நேரத்தில் 6 cm மழை பதிவாகியுள்ளது. விழுப்புரம் மாவட்டத்தில் அதிகாலை முதலிலேயே ஒரு சுமார் ஒரு மணி நேரத்திற்கு மேலாக கன மழை கொட்டி தீர்த்தது. அதேபோல் சென்னையில் பல்லாவரம், மடிப்பாக்கம், கீழ்கட்டளை, பம்மல் உள்ளிட்ட பல்வேறு பகுதிகளில்  மிதமான மழை பெய்தது.இதனால் வெட்கை சற்று குறைந்து குளுமையான சூழல் நிலவுகிறது. இந்த திடீர் மழையால் மக்கள் மகிழ்ச்சியடைந்துள்ளனர்.

இந்த நிலையில் குமரி கடல் மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. அதேபோல் லட்சத்தீவு மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. இதன் காரணமாக தமிழ்நாட்டில் இன்று முதல்  ஐந்தாம் தேதி வரை ஒரு சில இடங்களில் கன மழைக்கு வாய்ப்புள்ளது. அப்போது ஏழு முதல் 11 சென்டிமீட்டர் வரை மழை பெய்யக் கூடும் என்பதால் மஞ்சள் எச்சரிக்கை விடுத்துள்ளது இந்திய வானிலை ஆய்வு மையம்.

இன்று கனமழை:

 நீலகிரி, கோவை, திருப்பூர், ஈரோடு, தேனி, திண்டுக்கல், மதுரை,விருதுநகர், சிவகங்கை, தென்காசி, திருநெல்வேலி மற்றும் கன்னியாகுமரி ஆகிய மாவட்டங்களில் ஒரு சில இடங்களில் கனமழைக்கு வாய்ப்புள்ளது.

காலை 10 மணிக்குள் மழை பெய்யும் மாவட்டங்கள்: 

சென்னை, செங்கல்பட்டு, காஞ்சிபுரம், திருவண்ணாமலை, விழுப்புரம், கள்ளக்குறிச்சி,கடலூர், பெரம்பலூர், ராணிப்பேட்டை, வேலூர், சேலம், திண்டுக்கல், மதுரை, தேனி, மயிலாடுதுறை, நாகை, தஞ்சை, திருவாரூர், புதுக்கோட்டை, இராமநாதபுரம் ஆகிய 20 மாவட்டங்களில் காலை 10 மணிக்குள் கனமழைக்கு வாய்ப்புள்ளது. 

நாளை கன மழை: 

நீலகிரி, கோவை, திருப்பூர், ஈரோடு, சேலம், தேனி, திண்டுக்கல், மதுரை, விருதுநகர், தூத்துக்குடி, தென்காசி, திருநெல்வேலி மற்றும் கன்னியாகுமரி ஆகிய மாவட்டங்களில் ஒரு சில இடங்களில் கனமழைக்கு வாய்ப்புள்ளது. 

ஏப்ரல் 5ஆம் தேதி கனமழை:

 கோவை மாவட்டத்தின் மலைப்பகுதிகள், நீலகிரி, ஈரோடு, தேனி, திண்டுக்கல், தென்காசி, கிருஷ்ணகிரி, தர்மபுரி, மற்றும் சேலம் ஆகிய மாவட்டங்களில் ஒரு சில இடங்களில் கனமழைக்கு வாய்ப்புள்ளது.

மிதமான மழை: 

தமிழகத்தில் இன்று முதல் ஐந்தாம் தேதி வரை ஒரு சில இடங்களில் இடி மின்னல் மற்றும் மணிக்கு 30 முதல் 40 கிலோமீட்டர் வேகத்தில் பலத்த காற்றுடன் கூடிய லேசானது முதல் மிதமான மழைக்கு வாய்ப்புள்ளது.